رثاء بالمغفور له بإذن لله تعالى
سعود بن عبدالرحمن اليوسف
————
الله يعظم أجركم يالحموله
في الطيب اللي له معزه ومقدار
سعود …راح وباقياتن فعوله
يُذكر بعلم الطيب في كل الأقطار
مرحوم يارمز الوفاء والرجوله
فقيد الأصحاب والربع والجار
ياما تعنا …والنشاما …عنو له
وياما بذل للخير في سر وجهار
سبعين…عام للمكارم ..ميوله
ماصد عن ربعه ولاحط معذار
والطيب ماكل الأوادم تطوله
ياكود مثل سعود حلال الأشوار
له منزلن في المجد محد يطوله
مجمل اليوسف طويلين الأشبار
والموت حق وكل نفس تنوله
عزالله إن الموت قصاف الأعمار
يالله يالمعبود كرم ..نزوله
وفي جنة الفردوس مع خير الأبرار
من : ابراهيم بن عبدالكريم بن عبدالله اليوسف .
